من سئ لـ اسوء !

نفسي اعرف ايه اللي بيحصل في البلد !

حاجات كتير بتخرب وحرايق وناس بتموت .. كل دا لصالح مين ؟
الحاجة الوحيدة اللي اتوصلتلها ان لا السلفيين ولا المسيحيين ليهم يد في الموضوع دا
وكل اللي بيحصل تمثيليات وافلام عشان يظهر الفتنة الطائفية في البلد

ناس بتلبس لبس السلفيين وتعمل قصص وتيجي تقولك انهم رايحين يحرروا اختهم مش عارف مين اللي محبوسة في الكنيسة .. وهوبا الناس تتجمع معاهم وتحصل المجزرة
فعلا ً احنا شعب اهبل وعبيط عشان بنصدق الكلام الفارغ دا

امبارح وانا راجع من وسط البلد باليل كان فيه ضرب نار عند ماسبيرو .. وحرايق في العربيات اللي حوالين المبنى .. وعرفوا انهم بلطجية مجهولين الهوية !!

واول امبارح عربية نص نقل ماشية في اكتوبر تضرب بالرشاشات رصاص على الشقق والناس في الحي السابع !!

مش عارف بقيت احس اننا في الصومال او الدول الافريقية اللي تحت دي اللي المنظمات بتقتل في الناس على الفاضي

من الناحية التانية بئا .. على ما افتكر ان اسرائيل قالت ان مصر مش هتهدى لو وقعت معاهدة السلام بين فتح وحمااس !
يعني بتقولك بصريح العبارة اننا مش هنسكت لو حصل دا .. غير ان كان فيه برنامج اسرائيلي على القناة التانية الاسرائيلية مستضيفين فيه رئيس المخابرات الاسرائيلية السابق
اللي لما سألوه عن موقفه بخصوص اتفاق فتح وحماس .. قالهم : اهم حاجة الفتنة الطائفية فمصر
دا ان دل على شئ بيدل ان فيه ايادي خفية لو مكنتش حتا اسرائيلية يبقى هتكون من النظام الزفت اللي فات اللي نهب البلد وخربها وناوي يكمل عليها

مش عارف اقول ايه .. بس
هانت .. هانت اوي .. ربنا يعدي ايامنا على خير

>_<

رؤية سريعة للناس بعد الثورة

مؤامرات، كدب ، سلبية .. وفي الناحية التانية إخلاص ،وتفاني في العمل نوعا ً ما


طبعا الجزء الاول هيا حاجات بيحس بيها اي شخص بعد الثورة
والجزء التاني هوا القوات المسلحة


لو اتكلمنا عن الجزء الاول من السطر .. هقول ان مشفتش حد طالع من الثروة مستريح غالبا غالبا ً حاسس "بمؤامرة" وله حق في دا لأن لحد دلوقت الملامج السياسية مش واضحة فدا مش بيخليك حاسس انك مستريح
تاني حاجة بعد المؤامرة " الكدب " واكيد دا ناس كتير لمساه من سياسين بيتكلموا عن تغييرات ومبتحصلش و من وعود ومش بتتنفذ ودا طبيعي لأنه من بقايا النظام القديم
ثالث حاجة " السلبية " ودا للناس اللي استسلمت وعايزة تقعد في البيت والمطالب كلها تتحقق او اللي لسا بيشكك في الثورة ومش شايف انها جابت نتيجة ودي نماذج انا شفتها بعيني وبجد ببقى نفسي افههم بس للاسف بيبقى مخهم على قدهم وحافظين كلمتين بيرددوهم


عنصر المؤامرة لكل انسان شارك في الثورة وانه عميل .. دا انا بسميه غباء لأن الانسان دا محدش لسا شاف حاجة وحشة منه
امثال / البرادعي ،وائل غنيم ، عمرو موسى .. واي حد فكر يقف مع المتظاهرين بئا عميل
واحتمال انا كمان ابئى عميل ولا بس حظاظة خضرا .. ولسا امبارح كنت بكلم واحد صاحبي في امريكا على الشات .. الخ الخ من الهبل بتاع مجتمعنا


عنصر " الكدب " دا لازم يتحاسب عليه واكبر كدبة في الوقت الحالي هوا موضوع الوظائف اللي فالحكومة والشقق والكلام العبيط دا كله والناس بتجري ورااه وتشتري استمارات وفالاخر طلع وزير المالية على التلفزيون وقالك اصلا مفيش وظايف في الحكومة ، بالعكس دول عايزين يخففوا .. الناس جالها احباط اكيد ودا لمسته في صحاب ليا
لسا فاكرين ان شغل الحكومة هوا احسن حاجة .. مع انه روتيني وممل وللشباب اللي ملهوش طموح في حياته !
وقيس على عنصر " الكدب " كلام سياسين كتير في مصر تابعين للحزب الوطني او عاملين نفسهم مستقلين وهما مع الحزب الوطني ومش هدخل في التصاريح دي اوي لأني بكره اتكلم عن الاشخاص دي


" السلبية " احنا شعب سلبي ايوا لسا بقولها حتى بعد الثورة .. الناس مش عايزة تقوم من نفسها او تغير من نفسها ، مستنيين الناس تغيرهم ومستنيين تغيير فوري حالا ً ودلوقت في نفوس الناس .. مش عارفين ان لو رحت تدي امين الشرطة 20 جنيه هياخدخا منك ، لأنك انتا اللي اديتهاله من غير ما يطلبها .. لو رحت مكان وموقفتش في طابور هتلاقي الناس كلها زيك وثقافة اشمعنى دا .. مع انك انتا لو اصريت تقف في طابور هتلاقي الناس تقف معاك
احنا شعب سلبي .. وكله كوم واللي لسا بيقولك ان اللي عملوا الثورة ناس فاضية .. دا عايزله علاج نفسي لوحده لأنه مش داري الثورة اصلا اتعملت ليه او كان عايش في لعبة سيتي فيلا اللي على الفيس بوك.




الجزء التاني من السطر .. هوا كلامي عن القوات المسلحة
صراحة ً انا مشفتش حد بيحترم المواطن المصري ومديله قيمته أكتر من الناس دي .. وتقدروا تعرفوا وتحسوا دا من بياناتهم ومن احداث ليبيا الاخيرة
انا محستش بفخر ان مصري قبل الوقت دا طول حياتي .. ودا كلام بجد
بتحاول تحقق كل مطالبنا بس فيه عنصر خفي بيلعب من وراها وبيحقق طلبات النظام زي موضوع التشكيل الوزاري للمرحلة الانتقالية
الناس دمها مغلي من الحزب الوطني ومش عايزة تشوف اسمه تاني .. ويجي التشكيل الوزارة 90 % منه حزب وطني
لسا متمش تجميد ارصدة مبارك ! لسا الدستور بيتعدل مع اننا طلبنا يتغير كله بالكامل !
فيه نقط بتوصل الناس لعنصر " المؤامرة " اللي حساه من القوات المسلحة بس في نفس الوقت خطواتها في الاصلاح بتقنعك انك ممكن تستناها شوية


مش عارف اقول عنها حاجة وحشة وفنفس الوقت خايف امدح فيها اوي واندم على الكلام دا
بس الفترة الجاية هيا اللي هتثبت احساسي


دي كانت دردشة سريعة .. طويلة شوية بس كلام في دماغي حابب اقوله ,,

يوم 25 يناير

دي كانت بداية ثورة الحرية .. الثورة اللي شباب مصر كانوا كاتمينها من زمان
ثورتنا احنا بعد سكوت كل الجيل اللي قبلنا على اللي كان بيحصل والسلبية اللي كانوا عايشين فيها
30 سنة ظلم واستبداد واهانة .. 30 سنة حكم واستغلال وسرقة .. 30 سنة بنقولوا كفاية وهوا بيقول كمان كمان
كرامة المصرية انتهت في الـ 30 سنة دي ، اتسرقنا واتنهبنا والفساد بئا عيني عينك
عشان كدا كان لازم نفوق في أقرب وقت وهوا دا اللي حصل .

بدأ الموضوع اننا شفنا ثورة تونس وازاي حررت نفسها وبئت حرة بعد ما هرب رئيسها
وبعد تظاهرات لمدة شهر كامل قدروا يترجموا دا لتحقيق رغباتهم وكانوا مصرين على اللي بيعملوه
عشان تعرفوا ان ارادة الانسان ممكن تعمل ايه .. تعمل كل حاجة ممكن تتخيلها حتى لو هتغير نظام بلدك

بدأت المسيرات في اليوم دا بالمظاهرات في كل حته ، مسيرات في جميع ضواحي القاهرة
تم الدعوة اليها عن طريق الفيس بوك وتويتر وكالعادة الامن كان بيحاصر كل حتة الناس بتروحها او بتفكر تروحها
لأنه حاشر نفسه معانا وبيحاولوا يوقفوا اي مناوشات تظاهر .. بس حصل فعلا ً ان اتلاقى المتظاهرين والامن في كذا حتة
كان الامن وقتها واخد قرارات انه ميمسش حد واكتفوا انهم يقفوا واوقات بيرموا قنابل مسيلة للدموع عشان يفرقوا المتظاهرين

كان يوم طويل تابعت مسيرته على التلفزيون والانترنت من مكان شغلي .. لحد ما جاه الليل وشفت انهم اتحمعوا في ميدان التحرير تحت شعار " الشعب يريد اسقاط النظام " بجد كانت حاجة تحفة اوي وانا بشوفهم
اتحمست اوي ان انزل وفعلا ً قررت ان انضم للمجموعة دي اللي وقتها كان عددهم قرابة 50 الف او 70 الف وقرروا يباتوا في التحرير لحد اليوم التاني مصرين على طلباتهم
ومش عايزين يضيعوا اليوم اللي بدأ بمسيرات تعرضوا فيها لضرب كتير على ايد الامن

رحت هناك وكان مشهد الناس اللي هناك هيا الصورة اللي على اليمين من الكاميرا بتاعتي كان فيه ناس كتير اوي وجماعات بتنادي بسقوط الرئيس .. بس اللي كان عاجبني ان كلهم من طبقة عالية جدا
زبدة الشعب اللي هما شباب واعي ومثقف واللي دارسين بالجامعات الامريكية والبنات كانوا اكتر كمان من الشباب
غير كدا كان فيه ناس من المعارضين هناك زي أيمن نور وابن جمال عبد الناصر .. وكانوا داعم كبير للكل هناك على الاستمرار.

بدأ الكل يتوافد في الميدان والامن المركزي كان قافل كل الشوارع الجانبية والرئيسية اللي رايحة الميدان ، مش قافلها على الناس اللي بتمشي .. كان قافلها من العربيات انها تمشي فيه
لكن أي حد كان ماشي في الشارع كان يقدر ينضم لينا في التجمع دا

عالساعة 10 كدا .. بدأت الاحظ حركة غريبة في الامن المركزي ، صاحبي كمان لاحظها انهم بيخططوا لحاجة
ودا لأن كانوا بيدعموا نفسهم وبيقربوا كل شوية ببطئ ، احنا حسينا بقلق أوي
وقلنا نطلع نروح أي كشك نشتري حاجة نشربها ونرجع تاني .. طلعنا ورجعنا تاني بحذر وعيننا مانزلتش على الامن المركزي والخطوات الخبيثة اللي بيعملها
بدأت القيادات تكلم بعضها ، قلنا فيه حاجة أكيد هتحصل .. خصوصا ً ان سمعنا اشاعات ان مش هيسمحولنا نبات في الميدان !!

الساعة 11 تقريبا ً .. بدأ استهبال الامن المركزي بإطلاق صفارة انذار صوتها عالي أوي
الناس هاجت أوي وطلبت انها تقف قدام الامن في كل الشوارع الجانبية عشان ميتقدموش .. ومفيش دقيقة بالظبط
وبدأ التحرك ومعاه ضرب رصاص مطاطي وقنابل مسيلة للدموع !
القنابل المسيلة للدموع كانت بكمية كبيرة أوي .. طبعا ً احنا في اللحظة دي جرينا مع ناس كتير
الادهى من كدا كانوا موقفين بنت في الميدان اول ما صوت الضرب اشتغل فضلت تصرح .." الحقووا في واحد بيموووت " طبعا ً دي كانت تبعهم لأن الامن مضربش لسا نار على حد محدد
بس تكوين الناس اللي كانوا في الميدان اليوم دا مكنش يخليهم او يسمحلهم انهم يقاوموا كتير عشان كدا الكل بيجري والكل بيهرب
كمية القنابل المسيلة للدموع كانت كبيرة بشكل فظيع لدرجة ان ريحتها فضلت في الميدان لأيام بعد كدا !!!

المهم .. جرينا لحد عبد المنعم رياض ، انا اتعميت ومبقتش عارف اشوف ونفس الشئ صاحبي
كان معانا اعلام مصر .. بقينا ندور على حد معاه مية وحطيناها على العلم ومسحنا عينينا والحمد لله بئت كويسة .
مفيش بعدها بشوية بدأوا يطاردونا في ميدان عبد المنعم رياض ، والشباب زعلانة ان مجهود اليوم بدأ يضيع
فقرروا يلموا شملهم تاني تحت ميدان عبد المنعم رياض وبدأوا يرجعوا للتظاهر تاني وقفل الطريق عشان يبقوا براحتهم.

الأمن فضل يجري ورانا من الميدان لفندق رمسيس هيلتون ويرمي قنابل مسيلة ، كان وقتها الناس كلها بتجري وفيه اللي بيصمم ويقرر ان يلم نفسه مع صحابه تاني وينادي الناس
بس العدد بعد ما كان 50 الف .. بئا حوالي 500 واحد .. فمبقاش فيه نتيجة من اللي بنعمله غير اننا نمسك ميدان عبد المنعم رياض تاني
ونحاول نكسر اي عربية شرطة كانت بتعدي ، بعد اللي عملوه فينا .. من يومها بدأوا يضربوا المتظاهرين بعنف
وبدأوا يعاملونا معاملات وحشية .. بس مكانوش يعرفوا ان المعاملة الوحشية هتخللي الناس تعاند أكتر
وتيجي في الايام اللي بعد كدا .. اللي هبقى احكي عنها ان شاء الله في وقت تاني

دا كان يوم 25 يناير .. واللي اتسمت الثورة باسمه وبحمد ربنا كل يوم ان كنت جزء منه .. جزء من اليوم التاريخي دا
اللي كلنا كمصريين بنفخر بيه .. :)

- فيه فيديو وقت ما بدأ الضرب بميدان التحرير .. حبيت اخطه على الرغم ان مش باين فيه اي حاجة ومهزوز من الجري
بس عشان ابقى حطيت كل حاجة خاصة باليوم دا هنا .. اسيبكم معاه

مصر قالت

مصر قالت صوت ولادي كلمة الحق في بلادي
هما دول سر التحدي, هما دول زهرة جهادي
هما دول هما الشباب
مصر قالت الكرامة عزة النفس بشهامة
هما دول أكبر علامة, كل حي وله قيامة
زي ماقال الكتاب
مصر قالت أنحيازي عمره ماكان لأنتهازي
مستحيل هقبل تعازي, في الشهيد رغم أعتزازي
ألا من بعد الحساب
مصر قالت الحقيقة في العزيمة والأرادة
هما دول سر الريادة, والعمل افضل عبادة
تستحقي 100 ثواب

أول أقلامي هنا

في الحقيقة .. مش أول مرة أكتب ولا أول مرة أفتح مدونة 
عندي صفحتين على النت واحدة سرية وخاصة ودي محدش بيشوفها غيري وصفحة تانية ميوزك 
بس الصفحة دي كنت عايز اعملها من زمان لأن في نقد وفيه كلام كتير نفسي اكتبه والناس تشوفه 
 
حابب أقول بس ان مش كاتب بس صاحب رأي .. هحاول اوصل رأيي بطريقتي 
وبغض النظر على طريقتي تعجب حد او لأ .. دي صفحتي وللكل انه يكتب رأيه فيها وفكتاباتي

عموما مش هطول .. بس ان شاء الله هبدأ هنا قريب أوي ببوست عن يوم 25 يناير لما نزلت التحرير والاحداث اللي حصلت 


:)